د مهاجرینو چارو وزارت مسلکي مرستیال: فضیلت په تقوا کې دی
"فضیلت په تقوا کې دی" دا خبره د مهاجرینو او راستنېدونکو چارو وزارت مسلکي مرستیال الحاج مولوي عبدالرحمن راشد نن د غبرګولي اتمه د وزارت په جومات کې د دغه وزارت کارکوونکو ته په خطاب کې څرګنده کړه.
مسلکي مرستیال د قران کریم سپېڅلو آیتونو ته په اشارې سره زیاته کړه، مسلمانان د تقوا پر بنسټ پر یو بل فضیلت او غوره والی لري، نه د قوم، نژاد، مقام او ژبې پر بنسټ.
د هغه په وینا؛ په اسلامي نظام کې هېڅ ډول تبعیض، تعصب، قومپالنې او توکم پالنې ته ځای نشته، بلکې اصلي موخه د خلکو خدمت کول دي.
ښاغلي راشد وويل: له مناسبو شرايطو څخه په استفادې د دين د احکامو په زده کړه کې زيار وباسئ. هغه دغه راز د وزارت کارکوونکو ته په چارو کې د رښتینولۍ، ژمنتیا، مخلصانه خدمت او له مراجعینو سره د ښه چلن په اړه لازمې سپارښتنې وکړې.
