د مهاجرینو چارو وزارت او څلورو موسسو ترمنځ د همکارۍ هوکړه لیکونه لاسلیک شول
د ۳سوه او ۴۲ زره او ۳ امریکايي ډالرو په ارزښت، د مهاجرینو او راستنېدونکو چارو وزارت او د ټولنې د پیاوړتیا، د علمي څیړنې او د ټولنې پراختیا، په اسیا کې د نړۍ د ټولنیزو خدمتونو او د جګړې له امله د زیانمن شویو ماشومانو لپاره د کاناډا موسسې ترمنځ د همکارۍ څلور هوکړه لیکونه لاسلیک شول.
د دغو هوکړه لیکونو پر بنسټ، د ټولنې پياوړتيا موسسه به د حقوقي خدمتونو په برخه کې ٢٠٠ زره ډالره، د روزنيزو غونډو په جوړولو، د بيامېشتېدنې د خدمتونو په برخه کې د پنځو مرستندويه ټيمونو په جوړولو او په کابل، هرات، بلخ، ننګرهار او بامیانو ولايتونو کې زرو تنو ته د حقوقي برخو اړوند د روزنې په برخه کې لګوي.
په اسیا کې د نړۍ د ټولنيزو خدمتونو موسسه به په ننګرهار ولايت کې له ۴۱۰ کورنيو سره په دوو پلاوو کې د يو لک ۴۳ زره او ۶۳۶ ډالرو نغدي مرستې ووېشي، د جګړې له امله د زيانمنو شويو ماشومانو لپاره د کاناډا موسسه به د ۸۷ زره او ۵۶۷ ډالرو په ارزښت په ننګرهار ولایت کې ۲۰۰ کورنیو سره د ګنډلو وسایلو، د خامو موادو او د سوداګرۍ د پراختیا په پار مرسته کوي.
دغه راز د علمي څېړنې او ټولنې د پراختیا موسسه د ۵۳ زره ډالرو په ارزښت په کابل، کندز او بغلان ولایت کې ۲۴۰ تنو ته د ژمنیو جامو د وېش لړۍ پیلوي.
دا هوکړه ليکونه د وزارت د مسلکي مرستيال مولوي عبدالرحمن راشد او د پورته موسسو د استازو له خوا لاسليک شول.
