د مهاجرینو په وزارت کې د بې ځایه شویو د لېږد په موخه د همغږۍ ناسته وشوه
خپلو اصلي ځايونو ته د بې ځايه شويو کسانو د لېږد د همغږۍ ناسته د مهاجرت نړيوال سازمان د استازو او په افغانستان کې د ملګرو ملتونو د بشري مرستو د همغږي کوونکي په شتون کې د داخلي بې ځايه شويو په رياست کې وشوه.
د داخلي بې ځايه شويو کسانو رییس مولوي سردار شيرزاد وويل: موږ شاوخوا درې ميليونه بېځايه شوي لرو، د اسلامي امارت لومړۍ دنده دا وه چې دواطلبانه کورنۍ خپلو اصلي ځايونو ته انتقال کړي.
هغه زياته کړه، چې وضعيت د دغو کورنيو د لېږد لپاره مناسب دى، لسګونه زره کورنۍ خپلو اصلي ځايونو ته د ستنېدو لپاره چمتو دي، تېر کال د هغوى د لېږد پرېکړه شوې وه، خو د ستونزو له امله دا کار ونه شو.
شېرزاد وويل، دا يو لوى مسووليت دى او له ناستې يې موخه د بې ځايه شويو کسانو د لېږد په برخه کې له يو بل سره د همکارۍ او همغږۍ له لارې د دې ستونزې حل کول دي.
نوموړي دغه راز د کډوالو په چارو کې د ملګرو ملتونو له عالي کمېشنرۍ څخه وغوښتل چې د دغو کورنيو د لېږد په برخه کې په ګډه له خپلو ملګرو سره همکاري وکړي.
په افغانستان کې د ملګرو ملتونو د بشردوستانه مرستو د همغږۍ دفتر مرستیال او مشر محمد خاطر زید زیاته کړه چې موږ په دې برخه کې د مهاجرینو وزارت سره همکارۍ ته چمتو یو.
د مهاجرت نړیوال سازمان استازي جتیندرا بوهورا هم د سازمان د همکارۍ ډاډ څرګندکړ.
