د مهاجرینو او راستنېدونکو چارو سرپرست وزیر محترم مولوي عبدالکبیر له څو تنو پانګوالو او سوداګرو سره وکتل.
په دې ناسته کې چې د سوداګرو او پانګوالو پر فعالیتونو او یو شمېر نورو اړوندو موضوع ګانو خبرې وشوې، راغلو سوداګرو، د پانګونې لپاره اوسني فرصتونه مناسب وبلل او په وینا یې چې د اسلامي امارت په واکمنۍ کې د پانګونې کچه لوړه شوې ده او تمه ده، چې دا لړۍ لاپرمختګ ولري.
حاضرینو د سوداګرۍ پر وړاندې بانکي بندیزونه خنډ یاد کړل او غوښتنه یې وکړه، چې اسلامي امارت دې سوداګرو ته د مالیاتو د ورکړې په برخه کې بدیلې لارې او د مالیاتو پر کچه بیا کتنه وکړي.
دغو سوداګرو د خپلو یو شمېر ستونزو د حل په موخه خپل وړاندېزونه له محترم وزیر سره شریک کړل.
محترم مولوي عبدالکبیر راغلو سوداګرو ته ښه راغلاست وویل او زیاته یې کړه، چې د اسلامي نظام د هڅو په پایله کې کاروبار او سوداګرۍ ته ښه زمینه برابره شوې ده او اسلامي امارت هڅه کوي چې پانګوالو او سوداګرو ته لاډېرې اسانتیاوې رامنځته کړي.
د محترم وزیر په وینا، چې ښايي ستونزې وي؛ خو امارتي ادارې د ننګونو او خنډونو د له منځه وړلو مسوولیت لري او په دې برخه کې هڅې کوي.
