د مهاجرینو او راستنېدونکو چارو سرپرست وزیر محترم مولوي عبدالکبیر د زابل ولایت له والي ملا شیر محمد شریف سره وکتل.
په دې لیدنه کې ښاغلي شریف، زابل ته له پاکستان څخه د راستنو شوو کډوالو د وضعیت، هېواد ته د افغانانو د راتګ پر څرنګوالي او د هغوی پر اړتیاو خبرې وکړې او زیاته یې کړه، چې په زابل کې کډوال ځینو لومړنیو مرستو ته اړتیا لري.
د ښاغلي ملا شیر محمد شریف په وینا، چې تر دې دمه له راستنو شوو سره ځینې مرستې شوې او د لاډېرو مرستو په موخه یې خپل وړاندېزونه له محترم وزیر سره شریک کړل.
محترم مولوي عبدالکبیر د کډوالو پروسې ښه مدیریت ته په اشارې سره وویل، چې اسلامي امارت د مهاجرینو د عالي کمېسیون تر چتر لاندې یو شمېر کمېټو ته دندې سپارلې دي او تر دې مهاله له ځنډ پرته، د کډوالو ستونزو ته رسیدنه شوې ده.
محترم وزیر د زابل د والي وړاندېز ته د رسیدنې یادونه وکړه او زیاته یې کړه، چې د کډوالو د لنډ مهاله استوګنې د کمېټې له لوري به په زابل کې د راستنو شوو هېوادوالو ستونزې هوارې شي.
د ناستې په پای کې محترم وزیر وویل، چې د راستنو شوو د ستونزو د حل په موخه د سیمه ییزو ادارو هر وړاندیز ته رسیدنه کیږي او ټېنګار یې وکړ، چې مسوولین دې خپل پیشنهادونه پر وخت له اړوندو اداره سره شریک کړي.
