د مهاجرينو چارو وزارت د هغه بېځايه شوو نه ملاتړ کوي، چې غواړي خپلو اصلي سيمو ته ستانه شي
دغه خبره د مهاجرينو چارو وزارت د داخلي بېځايه شوو وضعيت ته د رسېدنې رئيس مولوي سردار محمد شېرزاد د تلې په ۸ مه په کابل کې د بېځايه شوو د کمپونو له استازو سره په ناسته کې وکړه.
په ناسته کې د هغه کمپونو د خالي کولو په اړه هم خبرې وشوې، چې په دولتي ځمکو کې جوړ شوي او د يادو کمپونو استازو د بېکارۍ او اقتصادي ستونزې د مهاجرينو چارو وزارت سره شريکې کړې او په دې برخه کې يې د همکاريو غوښتنه وکړه.
مولوي شېرزاد دوی ته ډاډ ورکړ، چې د مهاجرينو چارو وزارت هڅه کوي چې له هر مستحق کس او هرې کورنۍ سره چې غواړي خپلو اصلي سيمو ته ستنې شي د مرستو ترڅنګ ورسره د کاري زمينې د برابرولو په برخه کې هم همکاري وکړي.
هغه زياته کړه، چې په هېواد کې ۳۰۰ زره داخلي بېځايه شوي کسان شته، چې د امنيت په تامين او د شرايط په ښه کېدو سره بايد بېځايه شوي کسان بېرته خپلو اصلي سيمو ته ستانه شي او د مهاجرينو چارو وزارت د هغوی په خپله خوښه ستنېدو څخه ملاتړ کوي او ورسره لازمې مرستې کوي، ترڅو خپلو اصلي سموته ورسي.
د بېځايه شوو استازو د مهاجرينو چارو وزارت د همکاريو څخه مننه وکړه.
