د ترکیې سفیر د مهاجرینو چارو له سرپرست وزیر سره ولیدل

په افغانستان کې د ترکیې سفیر ښاغلي جنګ اونال د مهاجرینو او راستنېدونکو چارو له سرپرست وزیر الحاج خلیل الرحمن حقاني سره د هغه د کار په دفتر کې ولیدل
په دغه ناسته کې په ترکیه کې د مهاجرینو په ستونزو، د بندیانو په خلاصولو او ځینو نورو موضوعاتو خبرې وشوې
ښاغلي اونال وویل: ترکیه له افغانستان سره ښې او ژورې اړیکې لري، په ترکیه کې د افغان دیپلوماتانو شتون او د هیأتونو تلل راتلل له افغانستان سره د ترکیې د ښه نیت څرګندونه کوي
نوموړي وویل: د ترکیې پولیسو لخوا د مهاجرینو سره د ناسم چلند راپورنه کم شوي او که کوم ځای کې شکایت موجود وي، هم مونږ به یې په اړه اقدامات وکړو
د مهاجرینو چارو وزیر نوموړي ته له ښه راغلاست وروسته وویل، ترکان او افغانان په اسلامي، عقیدوي او تاریخي توګه له یوبل سره زیات مشترکات لري او دغه مشترکات باید له یوبل سره د ښو اړیکو لامل شي
ښاغلي حقاني وویل: دا چې ترکیه او افغانستان اسلامي هېوادونه دي، نو د مهاجرینو موضوع ته هم باید د اسلامي اصولو له نظره وکتل شي، د غیر قانوني مهاجرینو قانوني کولو لپاره په کړنلاره کار وشي او افغانانو ته کاري ویزې او نورې اسانتیاوې برابرې شي