د بېځایه شویو د شمېرو د همغږۍ په موخه ناسته وشوه
د داخلي بېځایه شوبو د شمېرو د همغږۍ په موخه د مهاجرینو چارو وزارت د داخلي بېځایه شویو په ریاست کې ناسته وشوه، چې د مرستو د همغږۍ، د مهاجرینو د اطلاعاتو او څېړنې، پلان او پالیسۍ، راستنیدنې او بیا میشتیدنې او د دایمي حل لارو موندنې ریاستونو استازو ګډون پکې کړی و.
د مهاجرینو چارو وزارت د داخلي بې ځایه شویو رییس مولوي سردار شېرزاد په دې اړه وویل: د داخلي بې ځایه شویو ستونزو ته د سملاسي رسېدنې او هواري په موخه ژر تر ژره له ملي او نړیوالو همکارو بنسټونو سره د خپلو شمېرو د یوکېدنې اړتیا ده.
د نننۍ ناستې ګډونوالو د بېځایه شویو ستونزو ته د رسېدنې او له دوی سره د مرستې په برخه کې د بېځایه شویو د شمېرو او احصایې برابرول اغېزناک وبلل او پر خپلې همکارۍ یې ټینګار وکړ.
په پام کې ده، چې د د دې موضوع په اړه ډېر ژر په کابل کې د یوناما له دفتر سره هم ناسته وشي.
