دکډوالو چارو سرپرست د مموزي ښارګوټي د ستونزو په ژر حل کېدو ټينګار وکړ
د مموزي ښارګوټي ستونزو د بياکتنې لپاره په ملي شورا کې د ناستې وروسته بله ناسته د شنبې په ورځ د تلې په ۱۲مه د کډوالو او راستنېدونکو چارو وزارت په مرکزي دفتر کې دهغو کډوالو د ستونزو د اورېدو په موخه جوړه شوې وه چې د ځمکې اخيستو حقدار پېژندل شوي و.
په دغه ناسته کې د کډوالو چارو وزارت سرپرست وزير نور رحمن اخلاقي، دملي شورا غړي حميد الله بيګ، د کابل والي محمد يعقوب حيدري، دښارجوړونې او ځمکو د اصلاح ادارې مرستيال ګل رحمن توتاخېل او دپلازمېنې زون پراختيا دفتر استازو شتون درلود.
کډوالو وزارت سرپرست په دغه ناسته کې وويل، ددې ښارګوټي دحل لپاره دهغه پخوانۍ ژمنې پر بنسټ، دکډوالو چارو وزارت دوه پلاوو د ننګونو کار پيل کړي، چې د ماموريت دوېش پر اساس هر يو په حقوقي برخه کې چې څنګه د ځمکې وېش د ولسمشر د فرمان، تخنيکي ننګونو اوپه دغه ښارګوټي کې د نمرو په وېش کې روڼتيا( شفافيت) سره سم کار کوي.
په ورته وخت کې دکډوالو چارو وزارت د حقوقي ملاتړ رياست په دغه ناسته کې وړانديز وکړ؛هغه خلکو چې پيسي يې بانک کې تحويلي کړي او تعرفې په لاس کې لري د مخکني فرمان له مخې مستحق پېژندل شوي او پيسې يې دمخکني فرمان له مخې تحويل کړي د يوې ګډې کمېټې د وړاندې شوو غړو د کنسرسيوم له لورې دې د ۳۰۵ ګڼه فرمان له مخې ورته نمرې ووېشل شي.
په پای کې هوکړه وشوه، چې د ځمکې د وېش له پيل څخه دمخه د ښارجوړونې وزارت او دپلازمېنې زون پراختيايي دفتر تخنيکي ټيم بايد د کډوالو د ښارګوټو د اصلاح لپاره پلان نهايي کړي او همدارنګه د ښارجوړونې وزارت بايد ساحه وټاکي.
په ورته وخت کې د کابل والي دځمکو د غصب مسلې د حل لپاره د کابل امنيه قومندانۍ په مشرۍ د عملياتي کمېټې ګمارنې خبر ورکړ.
په کابل کې دکډوالو مموزي ښارګوټی په ۶۰۰ جريبه ځمکې کې د دوو زرو کورنيولپاره جوړ شوی و،چې ۵۰۰ کورنۍ د ولسمشرۍ ماڼۍ د ۱۰۴ ګڼه فرمان پر اساس مستحقې پېژندل شوي او اسنادونه يې طی مراحل کړي چې تر اوسه يې ځمکې نه دي ترلاسه کړي.
