دایکندي کې د مهاجرینو لپاره د ځمکو ویش لړۍ پیل شوه
دایکندي ولایت کې د مهاجرینو ستونزو ته د رسېدو کمېسیون له لوري د مهاجرینو او راستنو شویو لپاره د ځمکو د ویش لړۍ پیل شوه.
د ځمکو دغه برنامه د ویش لړۍ د ملي دفاع وزارت لوی درستیز قاري فصیح الدین فطرت، د افغانستان بانک ادارو مسوولینو، اوسپنې پټلې ، بدني روزنې، د د ایکندي ولایت مقام، د یاد ولایت ځينو ادارو رییسانو، یو شمېر مهاجرینو او راستنو شویو په شتون کې پیل شوه.
ښاغلي فطرت وویل: خوښ یم چې دایکندي ته راغلی یم، د مهاجرینو ستونزې له نږدې ګورم او د دوی لپاره د ځمکو ویش لړۍ پیلوم.
هغه وویل: له څلور لسیزو جګړو وروسته اسلامي امارت واک ته ورسېده، جګړه یې ختمه کړه او ټول هېوادوال په ارام ژوند تېروي.
نوموړي همداراز زیاته کړه، چې اسلامي امارت د یو مسوول نظام په توګه خپل ټول توان په کار اچولی څو مهاجرینو ستونزو ته رسېدنه وکړي او د هغوی لپاره د دایمي مېشتېدنې امکانات برابر کړي.
د نوموړي په خبره، طرزالعمل له بشپړېدو وروسته د امیرالمؤمنین حفظه الله له لوري توشیح شوی او هغه مهاجرین چې د سرپناه ستونزې لري دغه ستونزې به یې حل شي.
د دایکندي والي مولوي نجیب الله رفیع هم مهاجرینو ته ډاډ ورکړ، چې د مشرانو له لارښوونې سره سم به ځمکې په عادلانه توګه مستحقو کسانو ته وویشل شي.
هغه وویل: د فخر ځای دی چې په دې کم وخت اسلامي امارت ټولو مسایلو ته متوجه دی او د مهاجرینو ستونزې یې په اساسي توګه درک کړې دي.
د دایکندي والي له موسسو هم وغوښتل، چې دغه پروژې په اساسي توګه جوړې کړې.
امان الله متحد د خلکو په استازیتوب وویل: د دایکندي خلک له فقر، بې وسۍ او محرومیت له امله ډېر ګاونډیو هېوادونو ته مهاجر شوي دي. دا چې اسلامي امارت دغه ولایت ته توجه وکړه او د مهاجرینو ستونزو ته د رسېدو کمېسیون پلاوی دغه ولایت ته ورغی؛ مننه کوم.
