ايټالیا له راستنېدونکو مهاجرینو سره د صحت په برخه کې همکاري کوي

د مهاجرینو او راستنېدونکو چارو سرپرست وزیر الحاج خلیل الرحمن حقاني تېره ورځ د ایټالیا له شارژدافیرې ناټالیا کوېنټاوېل او مل پلاوي سره په خپل کاري دفتر کې ولیدل
په پيل کې ښاغلي حقاني آغلې کوېنټاوېل او مل پلاوي ته د ښه راغلاست تر څنګ په پاکستان، ایران، ترکیې او یو شمېر نورو هېوادنو کې د مهاجرینو د وضعیت، ستونزو او تر اوسه پورې په اجباري توګه هېواد ته د راستنو شویو مهاجرینو په اړه معلومات ورکړل او زیاته یې کړه چې د اسلامي امارت په راتګ سره په هېواد کې پوره امن او شفافیت راغلی او د آبادۍ په برخه کې ډېرې پروژې پیل شوې دي.
ښاغلي حقاني وویل: کوربه هېوادونه باید نړۍوال قوانین مراعات کړي، په خپلو هېوادونو کې افغانان شکنجه او و نه ځوروي، شتمني یې ترې ضبط نه کړي او په اجباري ډول یې دې نه اخراجوي، دوی ته دې کافي وخت ورکړي تر څو په آبرومندانه توګه خپل هېواد ته راستانه شي. 
د افغانستان له پاره د ایټالیا شارژدافیرې  وویل: ایټالیا له افغانستان سره له ډېر پخوا راهیسې ښې او نه شلېدونکې اړیکې لري، موږ هڅه کوو چې افغانستان له موجوده وضعیت څخه وژغورو او ور سره په بېلا بېلو برخو کې مرسته وکړو چې لومړيتوب مو د صحت په برخه کې دی، مونږ فعلاً د هغو افغانانو سره د صحت په برخه کې مرسته کوو چې له نورو هېوادونو څخه په خپله خوښه او یا جبري توګه راستانه شوي وي 
آغلې کوېنټاوېل زیاته کړه مونږ غواړو چې په پاکستان، ایران، ترکیه او نورو هېوادونو کې د افغان مهاجرینو په کره شمېر وپوهېږو تر څو په راتلونکي کې له دوی سره په نورو برخو کې هم مرستې وکړو 
همدا راز نوموړې ښاغلي حقاني ته د راستنېدونکو له پاره د هېواد په ټولو په ځانګړي توګه سرحدي ولایتونو کې د روغتونونو په جوړولو او په طبي وسایلو یې د مجهزولو ډاډ ورکړ.