په نیمروز ولایت کې ۱۵۰۰ جریبه ځمکه د مهاجرینو د ښارګوټي د جوړولو په موخه د کډوالو چارو وزارت ته ولېږدول شوه.
د کډوالو او راستنېدونکو چارو وزارت په وړاندیز او د عالیقدر امیرالمؤمنین (حفظه الله تعالی) د حکم پر اساس د کرنې، اوبو لګولو او مالدارۍ وزارت د اراضۍ لوی ریاست له لوري د نیمروز ولایت په خاشرود ولسوالۍ کې ۱۵۰۰ جریبه ځمکه د مهاجرینو د ښارګوټي د جوړولو په موخه د کډوالو او راستنېدونکو چارو وزارت ته ولېږدول شوه.
د دې ځمکې د لېږد تړون د کرنې، اوبولګولو او مالدارۍ وزارت د اراضۍ لوی ریاست د ځمکو د انتقال او وېش رییس مولوي سید محمد سعید او د کډوالو او راستنېدونکو چارو وزارت د راستنېدنې او بیا مېشتېدنې رییس مولوي شکرالله شاکر ترمنځ لاسلیک شو . یاده غونډه چې د کرنې، اوبولګولو او مالدارۍ وزارت د اراضۍ لوی ریاست په ودانۍ کې جوړه شوې وه.
د کډوالو او راستنېدونکو چارو وزارت د دې مهمې پرېکړې له امله له اړوندو ادارو په ځانګړي توګه د کرنې، اوبولګولو او مالدارۍ وزارت څخه مننه وکړه او ډاډ یې څرګند کړ، چې دغه ځمکه به د مهاجرینو او راستنېدونکو هېوادوالو د بیا مېشتېدنې او د هغوی د ژوند د ښه کولو لپاره په اغېزمنه توګه وکارول شي.
