کندز کې د نړیوالو همکارو موسسو له استازو سره د وزارت د پلاوي ناسته وشوه
کندز ولايت ته د مهاجرينو او راستنېدونکو چارو وزارت تللي پلاوي د کندز د مهاجرینو چارو له رييس او له کابل څخه د تللیو او هلته د نړيوالو همکارو موسسو له استازو سره وکتل .
د وزارت د داخلي بې ځایه شویو وضعیت ته د رسېدنې رییس مولوي سردار شېرزاد د سفر د موخو او د ګډو تخنیکي ټیمونو او د داخلي او نړیوالو موسسو او بنسټونو د همکارۍ په اړه توضیحات ورکړل.
نوموړي له کابل ولایت څخه د کندز د چهاردرې ولسوالۍ ته د داخلي بې ځایه شویو په منظم ډول خپلو سیمو ته د ستنېدو او هغوی ته د لازمو خدمتونو د وړاندې کولو په برخه کې د دوی د همکارۍ غوښتنه وکړه.
ورپسې د ملګرو ملتونو د مرکزي دفترونو د ګډ تخنیکي ټیم رییس ښاغلي ونست وویل: په دې برخه کې ډېر بحثونه په مرکز کې په تفصیل سره شوي او له اړوندو نړیوالو بنسټونو سره لازمه همغږي شوې ده، چې هر دفتر یا کلستر باید د بې ځایه شویو او راستنیدونکو خلکو سره همکاري او رسېدنه وکړي.
د کندز ولايت دمهاجرينو چارو رييس مولوي عبدالولي محمدي د دغو بنسټونو د همکاريو قدرداني وکړه او په راتلونکي کې يې دهمکاريو او پروژو دزياتوالي غوښتنه څرګندهکړه.
نوموړي د دغې موضوع په اړه یو څه اړین معلومات هم د ناستې له ګډونوالو سره شریک کړل.
د ملګرو ملتونو د پراختیایي پروګرام استازي ښاغلي دوکن خبرې وکړې او زیاته یې کړه: د دوی اداره هم له دې مسئلې پوره خبر ده او له راستنیدنې وروسته به د ژوندانه او دایمي حل لارې پر پروګرامونو کار پیل کړي.
هغه په دې برخه کې د نورو کورنیو او نړیوالو بنسټونو همکاري اړینه وبلله.
ورپسې د بېلابېلو نړیوالو سازمانونو استازو د تېرو همکاریو او په راتلونکي کې د خپلو اړوندو همکاریو په اړه خبرې وکړې او ناسته پای ته ورسېده.
