کندهار، د میرویس نېکه خصوصي پوهنتون د راستنېدونکو مهاجرینو لپاره وړیا سکالرشیپونه اعلان کړل

د مهاجرینو او راستنېدونکو چارو سرپرست وزیر الحاج خلیل الرحمن حقاني کندهار ولایت ته د خپل سفر په ترڅ کې د میرویس نېکه خصوصي پوهنتون څخه لیدنه وکړه او ددغه پوهنتون له رئیس ډاکټر فاروق نعیمي سره یې د همکارۍ تفاهمنامه لاسلیک کړه
ددغه تفاهمنامې له مخې به د میرویس نیکه خصوصي پوهنتون راستنېدونکو مهاجرینو ته د روغتیا، اقتصاد او حقوقو په برخه کې ٧٠ وړیا سکالرشیپونه او نورو ټولو ته په ٨٠ سلنه تخفیف سره زدکړې ورکوي
ښاغلي نعیمي وویل، ددغه پوهنتون روزنیز روغتون ټولو راستنېدونکو لپاره وړیا درملنه کوي
د مهاجرینو چارو وزیر د یاد پوهنتون له رهبرۍ مننه وکړه او زیاته یې کړه، د هجرتونو، تپل شوو جګړو او یرغلونو له امله د افغانانو د زدکړو هیلې هروخت نیمګړې پاتې شوي او نور باید ددوی دغه هیلې نیمګړې پاتې نشي
ښاغلي حقاني وویل، ټول علمي او اکاډمیک مرکزونه دې د مېرویس نیکه پوهنتون په څېر د راستنېدونکو زدکړو ته لازمه توجه وکړي او ټول افغانان دې په هره برخه کې د مهاجرو لاسنیوی وکړي
نوموړي په بهرنیو هیوادونو کې په ټولو علمي کادرونو غږ وکړ، چې هېواد ته راستانه او د هېواد په بیارغونه کې ونډه واخلي