د کډوالو چارو وزیر د بغلان د بورکې ولسوالۍ له یو شمېر قومي مشرانو سره ولیدل
د کډوالو او راستنېدونکو چارو وزیر محترم مولوي عبدالکبیر د بغلان ولایت د بورکې ولسوالۍ له یو شمېر قومي مشرانو او د پکتیکا ولایت د زېړوک له ولسوال سره ولیدل.
په دې ناسته کې د بورکې ولسوالۍ قومي مشرانو خپلې ستونزې شریکې کړې او په دې ولسوالۍ کې یې د مهاجرینو د ستونزو حل لپاره د پراختیايي چارو د عملي کېدو غوښتنه وکړه. هغوی دغه راز د کډوالو د هرکلي لپاره د اسلامي امارت له هڅو ستاینه وکړه او ویې ویل، چې په یاده سیمه کې دې د ښوونځيو، کلینیکونو او سړکونو رغولو ته پاملرنه ډېره شي.
همدارنګه د پکتیکا ولایت د زېړوک ولسوالۍ ولسوال په دې ولایت کې د مهاجرینو د وضعیت په اړه معلومات وړاندې کړل او ویې ویل، چې په دې ولسوالۍ کې د کډوالو لپاره بېړنیو مرستو ته اړتیا ده. هغه وویل، چې زېړوک یوه غرنۍ او زلزلو ځپلې سیمه ده، چې ځانګړې پاملرنې ته اړتیا لري.
د کډوالو او راستنېدونکو چارو وزیر محترم مولوي عبدالکبیر له راغلیو مېلمنو د مننې تر څنګ وویل، چې د کډوالو د ستونزو د حل لپاره به اساسي اقدامات وشي. هغه وویل، چې اسلامي امارت د کډوالو او راستنېدونکو هېوادوالو د ستونزو حل او ورسره مرسته خپل لومړیتوب ګرځولی او ټولې ادارې به په پوره همغږۍ خپلې چارې ترسره کړي.
