د مهاجرينو چارو وزارت مرستيال د مهاجرت نړيوال سازمان مرستو ته د لاسرسي او د بېځايه شوو د تعقيب د پروګرام له مسؤلينو سره ليدنه وکړه
د مهاجرينو چارو وزارت مسلکي مرستيال مولوي عبدالرحمن راشد په افغانستان کې د مهاجرت نړيوال سازمان بشري مرستو ته د لاسرسي د مسؤل ښاغلي عدنان بغجتي او د بېځايه شوو د تعقيب د پروګرام له مسؤل هنيري کونينن سره په خپل کاري دفتر کې ليدنه وکړه.
ښاغلي عدنان وويل، مخکينۍ ناستې چې د مهاجرينوچارو وزارت له چارواکو سره پخوانيو ناستو زموږ پر فعاليتونو مثبتې اغېزې درلودې او د لاسته راوړنو ډکې وې او په بادغيس ولايت کې ددې ادارې د فعاليتونو د بيا پيل غوښتونکي شو.
ښاغلي هنيري وويل، چې د سروې موخه نه يوازې د بېړنيو مرستو رسول دي، بلکې د بېځايه شوو لپاره د دايمي حل لارې په موندلو کې هم اغېزمنې دي.
مولوي راشد وويل، هر بنسټ او موسسه بايد د مهاجرينوچارو وزارت سره په همغږۍ او هوکړې خپل فعاليتونه ترسره کړي، مرستې بايد د هوکړه ليک، تعامل او يا ميکانيزم په وړاندې کولو سره ترسره شي، د وزارت او د هغه مرستندويه بنسټونو ترمنځ چې مرستې ترسره کوي بشپړه همغږي موجوده وي ترڅو وکولای شو چې لوړو چارواکو ته ځواب ويونکي اوسو.
په دې ليدنه کې د وزارت د دفتر رئيس الحاج قاري محمد اجمل وياړ او د وزارت حقوقي سلاکار محمود الحق احدي هم شتون درلود او په راتلونکي کې يې د وزارت سره د فعاليتونو او جزياتو د شريکولو غوښتنه يې وکړه.
