د مهاجرينو وزارت د چارواکو اداري ناسته ترسره شوه
![sadam anwari](/sites/default/files/2022-09/299909872_5434254073332997_5969881309851018188_n.jpg)
د مهاجرينو او راستنېدونکو چارو د وزير الحاج خليل الرحمن حقاني په مشرۍ د وږي په (۲۰) مه د دغه وزارت د چارواکو اداري ناسته ترسره شوه.
په ناسته کې چې د وزارت د مرکزي چارواکو په ګډون جوړه شوې وه،په لومړي سرکې ښاغلي حقاني د کړنو په روڼتيا او د اداري فساد د مخنوي په اړه خبرې وکړې ويې ويل(( په ناسته کې چې کومې پرېکړې کېږي، اړونده ادارې دې يې د عملي کولو لپاره اقدام وکړي او پايلې يې د راتلونکي ناستې د ګډونوالو سره شريکې کړي)).
هغه د ناستې ګډونوالو ته وويل: (( دولتي پوستونه د خلکو د خدمت حيثيت لري او مسؤلين بايد په پوره صداقت او ايماندارۍ د خلکو دخدمت لپاره هڅې وکړي)).
وروسته مرکزي رئيسانو د مخکينۍ ناستې د پايلو د پلي کېدو په اړه معلومات ورکړل او په کارونو کې يې د لازياتې همکارۍ او همغږۍ ډاډ ورکړ.
په پاي کې د مهاجرينو او راستنېدونکو چارو وزير او د دغه وزارت مسلکي مرستيال مولوي عبدالرحمن راشد په بېلابېلو برخوکې مرکزي رئيسانو ته لازمې سپارښتنې او لارښوونې وکړې.