د ریاست الوزراء اداري مرستیال په کندهار ولایت کې د جبري راستنېدونکو له موقتي کمپونو څخه لیدنه وکړه.
دکندهار ولايت د مهاجرينو چارو رياست د راپور له مخې، د ریاست الوزراء اداري مرستیال مولوي عبدالسلام حنفي د لړم په ٢٨مه د دغه ولايت په سپين بولدک کې د اجباري راستنېدونکو له موقتي کمپونو څخه ليدنه وکړه .
په دې لیدنه کې له ښاغلي حنفي سره د کندهار والي، د کورنیو چارو، کرنې، اوبولګولو او مالدارۍ، مهاجرینو چارو وزارتونو مرستیالانو او د کمېټو مسوولینو هم حضور درلود.
په دغه ولایت کې د جبري راستنېدونکو د موقتې کمېټې مشر د ریاست الوزراء اداري مرستیال ته د ښه راغلاست ویلو تر څنک د خپلو ورځنيو کارونو په اړه بشپړ معلومات وړاندې کړل.
د ریاست الوزراء اداري مرستیال له ټولو هغو مسؤولينو څخه چې شپه او ورځ يې د راستنېدونکو د خدمت له پاره وقف کړي دي مننه وکړه .
حنفي وويل: چې ما له ټولو هغو دروازو څخه ليدنه کړې چې له پاکستان څخه زموږ مهاجرين راځي، زه بايد ووايم چې په دې برخه کې د کندهار ولايت د نورو ولايتونو په پرتله ښه دى.
نوموړي د هر ډول همکارۍ ډاډ ورکړ او په دغه ولايت کې يې د موقتې کمېټې د مسؤولينو له دغه نیک اقدام څخه ستاينه وکړه.
