د میرسی ماليزيا موسسې رییس د مهاجرينو او راستنېدونکو چارو وزیر سره لیدنه وکړه
دمیرسي ماليزيا موسسې ريیس ډاکټر محمد اقبال بن عمر يکشنبه د لړم په (٣٠) مه دمهاجرينو او راستنېدونکو چارو وزیر الحاج خليل الرحمن حقاني سره ليدنه وکړه او اړمنو کورنيو ته دبشري مرستو په اړه يې خبرې وکړې. دمهاجرينو او راستنېدونکو چارو وزیر له افغانستان او افغان کډوالو سره د مالیزیا له همکاریو څخه مننه وکړه ويې وویل، دا د مسلمانانو دنده ده چې یو له بل سره مرسته وکړي او پر ټولو یې غږ وکړچې له افغان ولس او په ځانګړې توګه له کډوالو سره دبشري، پرمختيايي او روغتيايي مرستو په برخه کې همکاري وکړي. د ذکر شوې موسسې ريیس وویل: موږ هڅه کوو چې د نړۍ په بېلابېلو برخو کې له افغان کډوالو سره مرسته وکړو او د هغوی غږ ټولې نړۍ ته ورسو. هغه زیاته کړه مالیزیا یو اسلامي هېواد دی او د افغانستان او سوريه په څېر اسلامي هېوادونو سره همکاري کوي. همدارنګه ښاغلي محمد اقبال زياته کړه چې دادارې اصلي دنده یې د روغتیا په برخه کې له اړمنو سره مرسته ده او دغه دفتر په نورو بشري برخو کې هم همکارۍ ته چمتو دی
