د کډوالو وزير؛ د بېځايه شوو د شته ستونزو لپاره هڅې کافي نه دي، بايد ډېر کار وشي
په هرات کې بېځايه شوو ته د خدماتو وړاندې کولو د همغږۍ په ناسته کې د کډوالو چارو وزيروويل، د بېځايه شوو د ستونزو د حل په برخه کې د ملي او نړيوالو بنسټونو هڅې کافي نه دي او په دې برخه کې ډېر کار ته اړتيا ده.
د ولسمشرۍ ماڼۍ د لارښوونې پر بنسټ د کډوالو او راستنېدونکو چارو وزارت د ملي او نړيوالو بنسټونو سره په همغږۍ د همغږيو د تدقيق، د برېښنايي پېژند پاڼو د وېش او د هرات ولايت د بېځايه شوو وګړيو د پوښښ په برخو کې په ګډ ډول د ولسي تړون په پروګرام کې يې لټه او هڅه کوي. د نننۍ ورځې ناسته هم په همدې موخه د کډوالو او راستنېدونکو چارو وزير نور الرحمن اخلاقي تر رياست لاندې په دغه وزارت کې جوړه شوه.
ښاغلي اخلاقي د برنامو اغيزمنتوب کې د موسسو همغږي مهمه وبلله ويې ويل: اړتيا ده چې زياته همغږي وشي ترڅو بېځايه شوو ته پر خپل وخت رسيدګي وشي. د هرات ولايت بېځايه شوي بېړنيو مرستو ته اړتيا لري او دغه موضوع بايد زموږ د ټولو لپاره په لومړيتوب کې وي.
هغه د بېځايه شوو د اوږدمهاله ستونزو د حل لپاره د ملاتړ او تثبيت د پلان په اړه هم معلومات ورکړل ويې ويل: داخلي بېځايه شوو ته لاسرسی د سيمه ييزو حل لارو ميکانيزمونو اصلي ډلو په ګډون په ملي او نړيوالو مشورو کې وړانديز شوی او موږ هيله لرو چې په دې برخه کې لا ډېرې هڅې وکړي.
د کډوالو او راستنېدونکو چارو وزير د مرستندويه همکارو اداروڅخه چې په هرات ولايت کې فعاليت کوي وغوښتل چې د راتلونکي ناستې څخه دمخه چې يوه اونۍ وروسته به ترسره شي د تېرو دووه کلونو راپور، د روان کال پلانونه او د هرات ولايت د بېځايه شوو وړانديزونه د کډوالو چارو وزارت سره شريک کړي.
په ورته وخت کې دکډوالو او راستنېدونکو چارو وزارت مالي او اداري مرستيال چې د يو پلاوي په مشرۍ يې هرات ولايت ته د بېځايه شوو د وضعيت د څېړولو په موخه سفر کړی وويل:چې د اوسنيو ستونزو دحل لپاره بايد بېځايه شوو ته ژر تر ژره کومکي کڅوړې ووېشل شي، خو د دايمي ستونزو دحل لپاره بايد کار وشي ترڅو بېځايه شوې کورنۍ بېرته خپلو اصلي سيمو او ولايتونو ته ستنې شي.
